فاعْلْ الْخِيرْ ( بالعاميةالمغربية ) // حميد يعقوبي // المغرب

 

سْعْدَاتْكْ يَا قَاصْدْ بِيبَانْ الرّْضَا ... سْعْدَاتْكْ يَا مْولْ الْعْقْلْ الرّْزِينْ

سْعْدَاتْكْ يَا لِّي بْكْلْمْةْ الْخَالْقْ ... صَالْحْتِ الْخُوتْ الْمْخَاصْمِينْ

---

حْفَرْتِ لْعْداوَة قْبْرْ وْدْفْنْتِيها ... وْزْرَعْتِ الْمْحَبَّه بْالْيَاسْمِينْ

طْرِيقْ الْخِيْرْ وِيلَا مْشِيتِي فِيها ... تْجْنِي رْضَا الله وْدَعْوَةْ الْوَالِدِينْ

-----

فِعْلْ الْخْيرْ يْبَانْ ضَاوِي عْ الْجْبِينْ ... يْقْشَّعْ الظّْلْمَة وْيْهْدِي الْحَايْرِينْ

الْكْلْمَة الزِّينَة فْ لْسَانْكْ مِيزَانْ ... تْفَاجِي الْغْمَّة عْلَى الْمْحْزُونِينْ

-------

قَلْبْكْ سَارْحْ خِيرْ كُلْ مَنْ جَا لِيهْ ...مَا فِيهْ خْدِيعَة وَلَا غْدْرْ لْمْسْكِينْ

يَا سَعْدْ مَنْ رْضَى الله وْقرب ليه ... ثَابْتْ الْقْدْمْ فْ طْرِيقْ الصَّادْقِينْ.