كان هنا واحد الإنسان // حميد يعقوبي // المغرب

 

لْقِيتْ رَاسِي فْ بْحَرْ الْخْوَاضْ كَيْقَلِّبْ

عْلَى شِي عَبَّارَة تْجْمَعْ شْتَاتُو .. وِتْرُدُّو لْدَارُو

قُلْتْ لِيهْ: فِينْ غَادِي؟

قَالْ: مَا عْرَفْتْ رَاسِي مِلِّي ضَاعْ مِنِّي رَاسِي

وْوَلِّيتْ ظَلّ فْ مْرَايْتِي

كَيْجَرّ ظَلُّو وْيبَاتْ فْدَارْ النَّسْيَانْ عَسَّاسْ

لَا أَنَا هُوَ ... لَا هُوَ أَنَا

غِيرْ جُوجْ وْجُوهْ فْ مْرَايَة مَكْسُورَة

كُلّ شَظِيَة كَتْقُولْ: هْنَا كَانْ وَاحِدْ الْإِنْسَانْ

لَا هُوَ حَيّ ، لَا هُوَ مَيّتْ

لَا هُوَ سَاكْنْ جَلْدُو لَا هُوَ عْلِيهْ بَرَّانِي

مْشِيتْ نْجَمَّعْ فْعْظَامْ النْهَارْ شْتَاتْ ضَحْكْة

وْنْفُتَّشْ فْجْيُوبْ اللِّيلْ عْلَى شِي حَلْمَة هَارْبَة

لْقِيتْ اللِّيلْ يْقُولْ: مَا رْجَعْــشْ هْنَا

لْقِيتْ الصّْبَاحْ يْقُولْ: مَا بَايْتــْشْ هْنَا

وْلْقِيتْنِي فْ الطْرِيقْ ضَحْكَة كَنْقُولْ:

ضَاعْ اللِّي كَانْ كَيْمْشِي فِّيَّ شَانْ وْهِمَّة

كَنْفِيقْ كَنْلَقَى ظَلِّي سْبَقْنِي لْلْحِيطْ كَنْسَوْلُو:

آشْ تَمَّا؟

يْقُولْ: غِيرْ الرِّيحْ كَيْعَاوْدْ هْضْرَة فْخْرْبَة مَهْجُورَة.

يَا رَاسِي ... وْشْكُونْ لَبْسْكْ هَادْ الْعْذَابْ؟

وْشْكُونْ خَلَّى فْ عْيْنِيكْ دْخَانْ السّْنِينْ؟

كُنْتْ بْحَالْ السّاقْيَة يْزَغْرَتْ فِّيَّا الْمَا

ؤُ وَلِّيتْ بْحَالْ الْبِيرْ الْمْطْمُومْ

لَا دْلُو يْطَلَّعْ سْرَارُو ، لَا عَطْشَانْ يْوَصْلْ لْمَاهْ

حْتَّى الْهَدْرَة وْلَّاتْ عْكَّازْ مْتَكِّي عْلِيهَا الْوَجَعْ

حْتَّى السّْكَاتْ وْلَّى جَلَّادْ كَيْسَوَّطْ فِّيَّ بْلَا مَا يْشْبَعْ

وْمِلِّي كَنْرْجَعْ لْأَوَّلْ الدَّرْبْ نْلَقَى خْطَايَا مَمْسُوحَة

بْحَالْ شِي عُمْرْ عْلَى وَجْهْ الْوَادْ بْالْمَا تَكْتَبْ

وْنْقُولْ: آشْ هَادْ الْعْجَبْ !

هَادْ الرَّاسْ اللِّي هْرَبْ مِنِّي خَلَّانِي عَسَّاسْ

عْلَى جُثَّةْ سْنِينْ،

وْمْشَى يْقَلِّبْ عْلَى كْسْدَة أُخْرَى يْسْكُنْ فِيهَا

يْقْدَرْ يْرْجَعْ فِّيَّا ذَاكْ الْإِنْسَانْ.