ما بقى فهاذ الزمان ما يليقْ
كثر لكلام بين الناس
كلشي خرجْ على الطريق
واصبحْ ساكنهم الوسواس
لا مشاعر صادقه ولا إحساس
فيق يالغافل من النوم فيق
راك بقيت لعبة بين الناس
كون فايق وعايق يالصديق
وبقى ديما محتاط وعساس
قبل ما تصبح رماد وسط حريق
وينتهي أمرك في أكلة لقمه أو شربة كاس
هذا زمان لكذوب والنفاق عنداك اتيق
فالضحكة الصفرهْ وفكلمة لاباس
وانج براسك قبل متصبح غريق
راه مبقات محبه مبنيه على أساس
هذا زمان الزربه الناس غير تايهين
كول فيي ناكل فيك تكلم في نتكلم فيك
معرفو علاش وفين رايحين
بهاذ البغض والحسد علي وعليك
فكر كثير وشوف بعيد
واحض من دواير الزمان
راه كل يوم ياتيك بجديد
يخليك تخيب وتفقد لمان
لا راحه لا وقت يكفي
لا نيه لا ثقه فعمل خالص
لا سلم لا دوا يشفي
آه على زمان عيشه ناقص
فين الناس اللولين
فين ناس زمان
اللي كنا عليهم معولين
فين التراحم والتكافل والاحترام ولمان
فين التقوى فين ليمان
الكل يقول غير نفسي
ومن بعدي الطوفان
حتى يوصل حسّي مسّي
ما يهمّو لا فلان ولا فرتلان
فين اللمة فين الجيران
فين الإنسانية فين الانسان
فين حكايات الجدات
اللي ترباو عليها لوليدات
كلها تقضات وسلات
وضاعت مع موجة القنوات
كلشي مشى مع الواد وكان يا مكان
وهكذا تقلبت الآيه
وتشبكت خيوط الروايه
وتاه المعقول وسط الدعايه
واصبح المزيان خايب والخايب مزيان
والدُّغْري ضاع ليه الحق والميزان
واصبح منصوب ف خبر كان
ومشى مع لحكايه وكان يا مكان
شخصية منسيه ف مسرح الحرمان
والمنافق ولّى راجل الساعة سيد الميدان
كيملك سوارت كاع البيبان
والداخل ليها غير من طرف فلان وفلان
واش موافقيني الحسره يالخوان
على زمان اليوم وزمان زمان ؟!
Aucun commentaire:
Enregistrer un commentaire
Remarque : Seul un membre de ce blog est autorisé à enregistrer un commentaire.