اللسان // نور الدين الهروش // المغرب

 

اللسانْ م فيه عظمْ

فكرْ مزيان عاد تكلمْ

تقدمْ وتوكلْ وزعمْ

وقبل م تزعم فكلامك خمّمْ

حْسنْ م تزربْ تغلط وتندمْ

حطْ السيف علَ لسانكْ

لـكــان ســـبابْ محانك

وبعْـدو علَ الشـتِيمه وسد وْدانك

لا تعطي فرصه لعديانكْ

يطيحو من قيمتكْ وشانك

لسانكْ لدلى وطوال دير ليه كمامْ

حصنو وضبطو وسد عليه بحكامْ

وفْــعال الــخيـر زَيْـدو لـقُـدام

وعند الشر احميه لجْمو بلجام

قبل ما ينطق بـكـلامْ ما هو كــلام

ويجرْجرك للحافه ويتلفكْ ف زْحام

ايلا مَحْسنتيش الـتَّــدبــيرْ

يمْكن يرميك ف قاع لبير

ويلا كنت رجل تَسْــيــيـرْ

يخلي أرضك مبسوطه حرير

يرفعك عالي فوق قدام لْغير

يحوّلْ كل امر عسيرْ يســير

هذا لسانكْ أنت تتحكمْ فيه

أما لسانْ غيرك فيه وفيه

كاين اللي تحسْ معاه بلمانْ

وكاين اللي ف حضورك ظريف حشمان

وفْ غيابك فظهرك يـــشبـع عـــضان

وكاين اللي جسمو خروفْ وراسو ثعبانْ

حْضي منو يا انــسـانْ

هذا ما قالو ناس زمان .

Toutes les réactions :