لوصية // نجاة احسايني // المغرب

جاتني خْبار
كَالوا متْ
شحال بكيت عليا
دموع كثيرة سالت
من عنيا
تفكرت رفاكْتي
ضحكي وغباوتي
تفكرت كلامي
وحلامي ف منامي
ساعة نضحّكني
وساعة نبكّيني
مشيت نعزِّي فيا
لقيتني حمامة لابسة كفن
بْ جنبها شْبر
شفتني ما كاينش
غير كلام بحتو ف الصدر
صبّرت راسي
كتمت نفاسي
شدّاتني الرعدة
قريت "يسّ "وترحّمت عليا
ترجيت مولايا
هنا ولهيه يخفف ما بيا
تهت ف حلامي مع قلامي
نجري وْرا ظلي
نحكي حالي ومقالي
نتخبّا ف صدر قصيدة
تحضنّي ..تذرعني
طب طب عليا
تفتح قلبي ..تبدل حزانو
تجني منوعريشات
جذورها ساكنة ف دواخلي
ف عقلي..ف لساني
عريشات كلام
صايرة تكبر او تكبر
تتفرع او تتفرع
تطلع منها شجرة مورقة
ف كل ورقة حرف وحريفات
يشعشع ويميل
يكُول قصيدة
تحكي الدخلاني والبراني
-وهاذيك هي اللي كانت ناقصني-
نكتبها ب دموع احزاني
نكتبها ب ضحك اسناني
ونديرها شاهدة
عند راسي وقدامي
نقراها ف نعاسي ونشوفها ف حلامي
نكُول فيها:
آه يا ليام
شحال انت قصيرة
صرفناك سنين وشهور
ناعورة ك تدور
كل واحد يجيه الدور
اااااه ياليام
عامك شحال طويل
وانت ف رمشة عين
سحابة طايرة
مابين لرض والسما
صوفة سايرة
تكسي وتعرّي
كفوف مرفوعة
تضربي و تحني
اااه ياليام
ف لحظة سرقتيني وخذتيني
ما خليتيني نشبع مني
....
ونا ما بين هادوا وهادوك
سولني راسي فين نكون؟
بين المادة والروح
تلقاني حرف
تلقاني معنى
تشوفني صورة
ترسمني لوحة
تشمني زهر
ف مشموم لعْمَر
....
لقيتني وحدي
كَلبي يشكي فراقي
فرحي ذاب ف ترابي
همّي كْبر وزاد كْبر
لملمت حروفي اللي ورثها لساني
كتبتها قصيدة نرثي حالي 

هاذيك هي وصيتي لي لي

*************