تايه وحدي // نور الدين الهروش // المغرب

تايهْ وحْدي بفنّي وغرامي

اِنَّاجي حبّي وغزالي اللي سْباني

عليك نقضي الليالي معذبْ سهرانْ

بكلامكْ لحْلو ساهي ولهانْ

سكنْتي قلبي وصِرْتِ أنفاسُه

وملكْتِ أَمالُه وأَساسُه

بُعدكْ عني يزيدْني عذاب

من حرْ شواقي ليك

علاش هاذ القسوَه وهاذ العتابْ

قرَّبْ خلِّيني نوصَل ليكْ

من هوَاكْ نباتْ نْقاسي

السّالبْني راحْتي ونْعاسي

لا بَرْقيَه لا جوابْ

لا خطاب يبَرّدْ نارْ القلب من العذابْ

لا ابتسامهْ منّك تفرّحْني

ولا نظرهْ منّك ترحمني

آه منْ حبّك شحالْ غْراني

وشحال ضْنانِي

وقلت يمكن تْحنّي وترحْمي

بعْد كلْ ما صابْني

ما يمْكنْش ننساكْ يا روح عمري

وما نقْدَرشْ ننْسى ما فاتْ

انت العين اللّي نشوف بيها

انت الوردهْ اللّي ناوي نسْقيها

انت الحياة اللّي نعيشْ فيها

تمنيت تبْقاي معايا ونعيشو جميعْ

في جوْ صافي منوَّر كلّه ربيع

في عالم كله هَناء وسعادهْ

خالي من لهْوالْ ومن كل الحسّاده

ونوصَلْ ما يتْمناه كلْ حبيبْ

ونْغُوصْ في همسْ الحبْ بلا تعذيبْ.

Toutes les réactions :