ف ازحام الوقت
تمشيني خطواتي
تجرّيني مرة
ومرة نعثر
ف اغواتي
يتعانڭ لفوق
مع لتحت
ويغبر عياطي ف سكاتي
وأنا ف ايامي نجر
نشرب لهيب لفراق
يتْحزّمني هلالْ لغروب
وبين جلايل لقصيدة
يسكني كانون حامي
ومن ڭاشوشي
يطلع لبوح اجمر
هاد لحياة بلا ارحام
والموت ف حبي يطمر
هاد لقدرة
لمْرڭدة لساني
واكلامي
ف قلمها اتشل
عشش ف لجوف
طوير مجروح
ؤ ف لمنامة
ارڭد علامي... سارد
كانت حلمة
في عين خيالي
نجمة
ف احجر لڭمرة تعوم
وليوم
اتّڭدا ف ارماد لبارح
وغدّا من فياقي يطُلْ
لابساه اضبابة
ؤ هو عطشان
فين ديك الرُّكبة
نتوسد ادفاها
فين داك اسقف
يحميني من لڭطرة
ويخلي حلمتي
تْزرّد اغداها
ها لخيال ارهينة
ف اظهر لعڭبة
والظلمة تمشطني
مواج بلا بحر
فين ديك الدّزة
نتْدَفٰى فحماها
والبسها سترة
تحمي ظهري من لغدر
قبل ما يتسل
لمنجل من اجواه
واتحش لمحبة من هواها
خلى لجرح يبوح
خليني ف لڭارة نتحيّر
بغيت نفيق
ويتحل احزام لساني
نحكي بلا خوف
ؤ نَبرُم كلامي... حامي
راه مزال غادية نحلم
وانفُك لجام حالي
ونشطّب الارض
من هاد الدم
اللي طلى وجه سماها
ونفرّش ارحامي
لسحابة الروح
اتسيّل ماها
ؤ تشبع لعين من دموعها
ويتروى هاد كلام
ؤ ف ديك لخيمة
يلعبو لوتاد
وتكون ليلة العرس
تفرح لعروسة بسلامها.
******
Aucun commentaire:
Enregistrer un commentaire
Remarque : Seul un membre de ce blog est autorisé à enregistrer un commentaire.