من گال عليك يا لالة// نجاة احسايني // المغرب

من گال عليك يا لالة
تمشي ب جنب الحيط
ب خطوات ساهتة
أو من تحت اللتام
حادرة العين
غانسة بياضك
طالبة الوقار
م الصغار او الكبار
وانت يالالة
نافشة ريشك
حسي مسي
عل العتبة تابثة
كي لخيال
ما دقي ف باب
ماتحتاجي جواب
راكي هنا راكي لهيه
ف وسط المجمع
بلا سلام
بلا كلام
واللي بغاه خاطرك
من دون الناس
توگفي عليه
بلا مشاورة
ف حلامو
ف منامو
ف عمالو
تسَمعيه حديثك
تعطيه العاهد
ماتخونيه
تعطيه العاهد
تْلبْسيه
او ف دواخلو
تسُّكنيه
اه منك يا لالة
ظنيتك ساهلة
لبنادم ماهلة
وانت ف رمشة عين
تغيري الكون
تخوي لمكان
وتخلي وراك
كان وكان
تخلي وراك
جبال كاتمة لنفاس
مسيلة لجفان ويدان
تخلي وراك
قلوب مجروحة
مايطولها نسيان
على الدوام
تجي يا لالة تشالي
ونوبتك ماتخطى
ماتعطل
الله واعلم
على من تحط
تسرق اللقمة
من فم الطير
والبسمة من بين السنان
ما تصير
الكلمة ف الحلق
تغرغر
ماعرفنا يا لالة
موراك شر ولاخير

******