فارس لهوى // نور الدين الهروش // المغرب

 

أنا كنت فلهْـوى فارس مغوارْ

في ساحة الحب عنيد جبارْ

في العشق بطل لا يشق له غبارْ

غير شفتك قلبي هب قـفـز من مكانو

ثار فار طار وشعلت نيرانو

قولو الله يحسن عواني وعوانو

وهكذا سلمت وحطّيت سلاحي

ورْميتْ كل ما كتبتْ من لواحي

وكسّرتْ ما نملك من رماحي

عيونك هزموني وفي شطْ بعيدْ لاحوني

وبسحـرْهم سكنوني وحلفو لا يفارقوني

كل ما حاولت نتجاهلهم يلتاقطوني

جسمك مكمولْ وقدك مفتولْ

وجيدك جيد غزالْ يعـقّـلْ المهبولْ

ووسطك آش عندي فيه ما نقول

شعرك ليل مظلّم بلا نجومْ

مسبسب حرير شِعْر منظوم

تيّهـني ما بين البارح واليوم

قول لي فين كنت ومنين جيتي

واش من كوكب نزلت

انت غير البشر

انت بدر انت قمر

سبحان اللي خلقك وخلاك صورة مكموله

واضحة باهية طايرة فِ العلالي محموله

زينك فتان كوكتيل ألحان

يؤديه جيلاله والغيوان

اليوم صْـبحت هاني مرتاح راسي حاني

بعيد عَ لهوى وسوق الغواني

واكتفيت بسهمك اللي مازلت منو نعاني .