بغا يتعلم إكون ذيب !! (زجل) // محمد علوى // المغرب

 

بْغَا يَتْعَلَّمْ إِكُونْ ذِيب

جْبَرْ زْمانْ كَتْرو كْلابو

قالْ إِكونْ كَلْبْ لْبيبْ

سَعَّ دِّيبْ كَتْرو حْبابو

مْشَى يْدُورْ فينْ إِصِيبْ

حْتَى دِّيبْ راهْ سَدْ بَابُو

لْبَسْ بْطانَةْ ذاكْ لَعْطيبْ

ما خَوَّفْ راسو لا صْحابو

نْبَحْ نَبْحَةْ لْعارَفْ لَخْطِيبْ

ما سَمْعو لا جارو لا قْرَابُو.

تْخَلْطَتْ لَلْوانْ لْحالْ ضْبيبْ

كُلْشي خارَجْ هازْ قْرابو .

دَّرْهَمْ فَدْروبْ صْبيبْ

شْكونْ باغي اِعَمَّرْ جْيابو.

زْمانْ نَّكْسَة طْغا صْعيبْ

لِبْغا نَّارْ يَزْنَدْها مَنْ كْعابو.

وَا هْيَا هَدَاكْ لْفَاهَمْ لْبِيبْ

لِي حَبْ مَيْمُونْ يَبْغِيهْ بَقْبَابُو

تْبَارْكْ اٌلله عْلَى مُولَايْ دِّيبْ

مْدَوَّرْ بِيهْ غِيرْ لِشَادِّينْ كْلَابُو.

زْمانْ وَاشْمَنْ زْمان خْبيبْ

فايَنْ ناسو وَ هْلُو وَ شْبَابُو.