زجل // نجاة احسايني // المغرب

فُوقْ التْراب 

وْتحْت التراب

هاهي عنْدي

وْهاهي عَندك

كالوا جوج وراق

جوج وقات

جوج حوال

هو الَعْمَر

المَنْسوخ فُوقْ الجْبين

المَرْشُوكْ (g) بِين العِين والعين

اَيلا نْدارْ لَيهْ لْسان

يَدوِي وَيْكُولْ 

اش يمكن يكون

الدَّنياخط قصير

وخَّ تبان طويلة

ك تبْدا بْ نقطة

وتسالي ب نقطة

مابين النقطة والنقطة

بنادم ساير

علی كتافو عْبار

فيه غيار

فيه مرار 

فيه سرار

ما بين النقطة والنقطة

منصوب ميزان

هازْ صروف وظروف

علی جوج كفوف

والمكتوب مامَنُّو هروب

اليومَ عندي

وْغدّا عَنْدكْ اَلْغافل

نجاة احسايني س/ ا/ غ 5/10/2017