نكَول كلمتي ..// وفاء أم حمزة // المغرب

بيني وبيني

محطّة من كلام 

امدّرّح اسكات

امدَرّي بلا ريح

وامزمّم ف لوحي وشام 

كل حرف شجرة

ولغابة صُرّة لغريب

ف ظلها 

تَتْخمّر لْواني

نرسمني ف صفحة 

نعصرني مداد ل أقلام 

يتْكمّش داك لّي كان 

ولما يجري بلا ميعاد

واللي جاي ف اهداب ليّام

يحرّك وتار لهجهوج

ويصرّفني كلمة تدوي 

تسكن عروقي 

وتخلّي فوقي

بلا اسقف

تسيل الشمس

من شقوقي

وترميني تنهيدة بلا عنوان

ف مقام لڭمرة 

تحنّي لي 

تكمكمني بغمزة 

وترخي سوالفها 

ف كل مكان

نشوفني حلمة ف السّما 

جغمة ف حلق لعطش

نغمة ف ڭلب اطرش

ونجمة ف احضان لبحر

نظفر امواجو ملح

ونبني بيت قصيدي

نشطّب من ترابي لحرج

ونقول 

سعدات ليوم بغدّا 

وسعدات طفلتي بجدة

ولعّدة 

محزمَة لَرحيل

ركّبات عَوْدها 

والسّربة تحرك لَرض

احصادها علّام 

ؤ لعشية تطوي لكلام

تحت حايك الزمان 

جناحو اغرام

مْزغرتْ اتبوريدة 

اسمعتها من هناك

طلقة 

ف ساحة لڭلب

كلمة عيات من لكلام

*****

وفاء أم حمزة ج