الناغور // فؤاد العنيز // المغرب

بغيت نعرف حاجة وحدة

نعرف شبابي فوقاش بدا
وقتاش عشقت هاذ الوطن
وربّيت عليه الكبدة
بغيت نعرف عافاكم

سباب بلايا وبلاكم

شكون لي خلّاها خربة

شكون بناها من كذبة

سمّرها فحوافر لخيول

گالوا كانت سربة سربة

باغي نعرف عافاكم

لازم نعرف ولابدّ

داروا لغشاوة على عينيك

الزهر والنوّار داير بيك

ملّي تفيق تلقى حفرة

غارق من راسك لرجليك

واذا حلمتي راسك شبعان

عرگتيها لبارح خرفان

الصباح لقيت راسك حولي

البارح شي احزاب داروا زردة

كل حولي ينطح حولي

كل بيبي يقول حبيبي

كل فرّوج بقرعة دالروج

ياك ذبحوا لينا تا لحمام

عيشونا ليلة فالأحلام

دعاوا معانا الليلة بعام

دواواِ معانا لحّنوا لكلام

من كرمهم كلمة بالزوج

من كرمهم نسينا غدّا

قالوا لينا غنموا لوقات

فقنا لقينا الحفلة سالات

ضميرنا يمكن واقيلا مات

والحالة بقات هيَّ هيَّ

سالا التمثيل والصّح بدا

فمدينتنا مثلا

قسموا لمدينة بالسكة

ملّهيه سمّاوه القشلة

ومن هنّا يمكن لعدو

تا حصلة ضحات السكّة

يمكن كانت من لبدو

غير السور زاد تعدّا

حيث فالسّور داروا ناغور

وقالوا دوزوا بالواحد

علاش الزربة والعام طويل

نهاركم داير كيف الليل

آش فيها كاع الا تنتاظر

التيساع قالوا فالخاطر

.سيروا غي وحدة وحدة